AI-мадэрацыя абрасла наладамі

AI-мадэрацыя выехала з шасцю гатовымі тэмамі — скам, фішынг, гэмблінг і кампанія. Гэта закрывае тое, што замінае ўсім, але ў кожнага чата свой спіс недарэчнага, і ён рэдка супадае з чужым. За паўтара месяца блок аброс усім, чаго ў ім не хапала.

Свае правілы звычайнымі словамі#

Галоўнае дапаўненне. На ўкладцы «Правілы» да ўбудаваных тэм можна дадаць свае. Правіла — гэта апісанне таго, што лавіць, а не каманда боту: што рабіць са знойдзеным, вырашае ланцужок пакаранняў, як і ў астатніх блоках.

Пішацца звычайным тэкстам, без сінтаксісу — ні дужак, ні сувязяў, ні экранавання:

• паведамленні з нецэнзурнай лексікай ці абразамі;
• прапановы працы і заробку, у тым ліку «пішыце ў асабістыя» і спасылкі на каналы з вакансіямі;
• аб'явы пра продаж чаго заўгодна, акрамя рыбалоўнай снасці і прыкормкі;
• зборы грошай, рэквізіты картак і просьбы скінуць на нешта;
• абмеркаванне палітыкі, выбараў і ваенных навін;
• рэклама староннiх чатаў і каналаў, запрашэнні перайсці ў іншую супольнасць;
• пераход на асобы і абмеркаванне саміх удзельнікаў, а не іх паведамленняў.

Выключэнні пішуцца там жа і такімі ж словамі: «расказ пра ўласную працу — не парушэнне». Мадэль разумее фармулёўку гэтак жа, як разумее ўбудаваную тэму, і гэтак жа ловіць яе ў любых перафармулёўках.

Адно важнае абмежаванне: мадэль бачыць толькі само паведамленне. Яна не ведае, пра што ваш чат, хто аўтар і які сёння дзень, таму фармулёўкі накшталт «не па тэме чата» ці «афтоп» для яе пустыя — пералічвайце канкрэтна, што лічыць парушэннем. На правіла адводзіцца 500 сімвалаў, і гэтага хапае з запасам.

Парадак, адчувальнасць і сімулятар#

Свае правілы правяраюцца асобным запытам і толькі калі паведамленне не трапіла ні ў адну з убудаваных скам-тэм, — і зверху ўніз, у тым парадку, у якім вы іх расставілі. Парадак мяняецца стрэлкамі, так што важнейшае правіла можна падняць вышэй.

У кожнага правіла свая адчувальнасць: «Дакладны» рэагуе толькі пры высокай упэўненасці мадэлі, «Адчувальны» — і пры сярэдняй. Для лаянкі падыдзе другі, для «пераходу на асобы» — хутчэй першы.

Праверыць фармулёўку, не чакаючы жывога спаму, дапамагае сімулятар: устаўляеце прыклад паведамлення і бачыце, якое правіла спрацавала б. Санкцыі пры гэтым не прымяняюцца, але праверка спісваецца з балансу як звычайнае паведамленне, а ўбудаваныя тэмы ў сімулятары не ўдзельнічаюць — толькі вашы правілы.

Сваё пакаранне ў кожнага правіла і тэмы#

У правіла ёсць імя, і далей яно жыве само па сабе: свой ланцужок пакаранняў, свой лічыльнік парушэнняў, свой радок у журнале. Тое ж самае атрымалі ўбудаваныя тэмы: за фішынг можна баніць адразу, а за рэкламу гэмблінгу абмежавацца папярэджаннем, і гэтыя парушэнні не складуцца ў адзін лічыльнік.

У логу мадэрацыі цяпер відаць не агульнае «спрацавала AI-мадэрацыя», а назву канкрэтнага правіла ці тэмы. Пакуль санкцыі не зададзены, правіла не спрацоўвае — і кабінет пра гэта проста папярэджвае, а не пакідае маўклівае правіла ўключаным.

Кантроль расходу#

Блок платны па факце працы, таму з'явіліся налады, якія вырашаюць, клікаць мадэль ці не:

• мінімальная даўжыня паведамлення — «ок» і «дзякуй» у мадэль не ідуць зусім;
• не правяраць тое, што ўжо злавілі — калі паведамленне адсеклі фразы, спасылкі, regex ці даўжыня, мадэль па змаўчанні не клічуць; асобная галачка прымушае праверыць усё роўна і можа выдаць другую, незалежную санкцыю;
• альбомы — уключаюцца асобна, бо альбом з дзесяці фота гэта дзесяць праверак, а не адна.

Правілаў таксама варта трымаць роўна столькі, колькі трэба: кожнае ўдзельнічае ў праверцы кожнага паведамлення і робіць апрацоўку даражэйшай. Таму правілаў на чат не больш за дваццаць, а кабінет папярэджвае пра рост кошту, а не моўчкі спісвае больш.

За паўторы вы не плаціце двойчы#

Тое ж самае паведамленне спамеры рассылаюць дзясяткамі копій. Плаціць за кожную копію бессэнсоўна, таму праверка аднолькавага тэксту каштуе як адна: паўтор атрымлівае гатовы адказ і да мадэлі не даходзіць. У гісторыі балансу такія праверкі пазначаны асобна, так што эканомію відаць.

Аўтапапаўненне#

Баланс, які скончыўся ўначы, азначае чат без AI-мадэрацыі да раніцы. Цяпер можна задаць парог і суму — і калі рэшта падыходзіць да ніжняй мяжы, баланс папаўняецца сам. Паведамленне пра нізкі баланс прыходзіць у любым выпадку.